السلام عليكم
اليوم درت واحد السفة شفتها دارتها واحد الضيفة ديال شميسة وجات روعة وقلت نشارك بها حتى الحبيبات ديال المنتدى الغالي نفيدهم كيفما استفدت الكثير منهم
انا صورت غير المهم
اولا كناخدو الدجاج نصبوه عادي كنظن الانيقات كلهم عارفين نشلضو البصلة الزيت الدجاج ونديرو العطرية البزار سكنجبير الخرقوم البلدي الزعفران شعرة عويدات القرفة شوية السمن الربيع نقليوه مزيان ونرويوه ونخليوه يطيب مني يطيب نزولوه من المرق ونخليو المرق حتى يشرب ونحصلو على دغميرة واقفة
الدجاج نزولو ليه العضام ديالو بحال لغدي نديروه في بسطيلة كما في الصورة
كناخدو شوية البرقوق والمشماش يابسين والزبيب نغسلوهم ونفوروهم في الكسكاس حتى يطيبو ونقطعو كل من المشماش والبرقوق طريفات صغار كما في الصورة
ناخدو شوية اللوزمصلوق ومقلي نهرمشوه وحتى شوية الكركاع نخليو شوية باش نزينو
الشعرية ديال السفة حتى هي ندهنوها بالزيت ونفوروها انا كنفورها 3 مرات وكل مرة نخوي عليها الماء طايب ومملح في الاخير كندير ليها شوية الزبدة والعسل كتجي غزالة احسن من سكر كلاصي
دابة ندوزو المونطاج ههههه
كنديرو طبقة ديال السفة من بعد طبقة ديال الدجاج
نكبو عليها الدغميرة من الفوق
نكملو الموضوع
من بعد كنديرو بالتتالي البرقوق اللوز المشماش الكركاع ومن بعد شوية الزبيب ونخليو باش نزين
ونغطيوها بباقي السفة ونزوقوها حسب الدوق
كنقدموها بالحليب منسم بماء الزهر وبالصحة والراحة
نتمنى تعجبكم
0 التعليقات: